Certified crazy

Its that time of the year again. Rains.

Geeli mitti. Sukhe patte. Khaali sadak. Ped ke neeche ruke hue log. Kaagaz ki kashtiyaan. Raincoat pehen ke paani me khelte hue bacche. Saree utha kar chalti hui auntiyaan. Bhari hui autorickshaws. Office me late pahunchna. Geele hue kaagaz aur kitaaben. Chatri me hole. Pair chappalon se phisalna. Sardi. Geyser ke paani se nahana. Juhu beach pe bhutte aur garam chana masala. Maa ki god me sokar kahaani padhna. Paneer ke pakode. Mug bhar ke coffee. Adrak wali chaai. Sadak pe bheegte hue paani puri khana. Road cross karte karte chatri kauva hona. Zor se hass padna. Radio pe romantic gaane sun kar kisi ko yaad karna. Garam kande ke bhajiye. Tomato ketchup aur chatni. Chappalen kharab ho jaana. Maa ki daant. Kapde geele rehna. Kaapna. Apni besuri aawaaz me gaana. Hasna. Geele kabutaron ko khidki pe baithe dekhna. Aur garam chaawal dena. Aakhri aam ke liye jhagadna. Sab ka ek ek piece khana. Moongfali ko boil karke khana. Chilke ke dher me ek moongfali dhoondh ke khana. Aur uske liye jhagadna. Ice cream khana. Aur doctor ke paas dawa lene jaana. Haste haste wapas lautna. Dawaa na khana. Baarish ruk jaane par, chaand ko dekhna. Chaand ka badal ke peeche chip jaana. Geele hote hue beach par lehero ke saamne khade hona. Aur aakhen bandh kar dena. Aur kisi khaas shaks ka hasta hua chehra nazar aana. Aur aankhon se kuch aansoo-on ka nikalna. Khushi ke. Gum ke.

Aur fir se fir wahi zindagi shuru hona.

Its that time of the year again.

Life sucks, sometimes.